Jon Askeland, formann i Vestmannalaget, hev dei seinste dagarne sett i gang ein aksjon for å stogga det lovleg innkalla årsmøtet i Vestlandske Mållag. Vestlandske Mållag hev vore fylkeslag i Ivar Aasen-sambandet sidan 1971, og formannen i Ivar Aasen-sambandet, Klaus Johan Myrvoll, meiner det er grunn til å spyrja etter motivi for denne aksjonen.

Jon Askeland er ikkje berre formann i Vestmannalaget, han er òg formann i forlaget Norsk Bokreidingslag. Der er Vestlandske Mållag hovudaksjonær. Fram til sumaren 2001 hadde Jon Askeland i årevis halde årsmøte i Norsk Bokreidingslag utan å kalla inn luteigarane. Men i juli 2001 sette Vestlandske Mållag foten ned og kravde lovleg innkalla årsmøte. På det umframme årsmøtet kom det fram at lutmidelen var tapt og gjeldi stor. Samstundes neitta formannen og forretningsføraren å gjera greida for postar i rekneskapen på mange hundrad tusund kronor. No er Askeland formann i lutlaget Norsk Bokreidingslag og samstundes formann i Vestmannalaget. Vestmannalaget hev eit fond som skal nyttast til å fremja målreisingi, og som er styrt beinveges av stjorni i Vestmannalaget. Eit fleirtal på fjore i stjorni i Vestmannalaget er dei same som sit i styret i Norsk Bokreidingslag. Attåt hev Askeland gjort seg sjølv til forretningsførar for det nedleggjingstruga bladet Vestmannen, som er godt for yver 200 000 kronor.

På årsmøtet i Vestmannalaget 14. mars vart sentrale medarbeidarar og vanlege tilsette i prenteverket Bodoni Hus, den fremste kravsmannen åt Norsk Bokreidingslag, mobiliserte for å tryggja fleirtal for Askeland-regimet. No freistar Jon Askeland å føra striden i Vestmannalaget inn i Vestlandske Mållag. Saman med ein medspelar kjem han med personretta åtak mot formannen i Vestlandske Mållag, som millom anna vert kalla ”diktator”. Er det plagsame krav um innkalling og innsynsrett i Norsk Bokreidingslag som Askeland no vil ha ende på?

For Ivar Aasen-sambandet

Klaus Johan Myrvoll,
formann