Noko um eit fyredrag av Ottar Grepstad, direktør for senteret for nynorsk skriftkultur.
Me hev fenge eit Dokumentasjons-og opplevingssenter for nynorsk skriftkultur
i Volda. Skulde det tyda at den statlege målrørsla er tenkt til å byrja
med skriftkultur, etter alle desse åri på norsk folkemålsgrunn? På
senteret si internettsida finst eit fyredrag, halde 24.11.2000, av direktør
Ottar Grepstad, og det gjev ingi von um at nynorsken hev fenge ein ny
stridsmann med fagleg tyngd. Skal nynorsken hava ei framtid, lyt han
eksistera. Det gjer han ikkje hjå Grepstad, her er det dansknorske ord
høgt og lågt: behov, beretning, bruk, bety, holdningane, mangelen, bli,
nødvendig, vedrører, forholdet og mange, mange fleire. Nokre dansknorske
ord hev ei form som strid mot nynorskrettskrivingi, so Grepstad skriv viss
og meiner hvis, erkjenning for erkjennelse og motarbeiding for
motarbeidelse. Kven skal få hug til norsk mål um det berre er ei
banalisering av det dansknorske?
Verre er reine språkfeil; ein plass skriv han den og meiner han, ein plass
gløymer han at ord på -ing er hokyn og skriv tilslutningen. Verst er
stilen, Grepstad nyttar ikkje sernorske segjemåtar; setningsmelodien er
heilt ut dansk-norsk avisprosa. Den hev lese mykje i Dagbladet, som skriv so
klisjefylt eit mål. Ikkje eingong dette er feilfritt; me finn uttrykket
"freista ikkje til å gjere noko overilt"; dansknorsken hev ordet 'friste' og
so sleng ein inn ein diftong og huhei, so hev ein nynorsk. (Og overilt, er
det verre enn berre ilt?)
Utan målet er målrørsla redusert til eit Flat-Jord-Samfund.
So Grepstad agiterar som ein gjer i slike lukka, paranoide samlag; me finn
skort på logikk og samanhang, faktafeil og irrelevante utsegner. Skal ein
sjå på heilskapen i fyredraget, syner det seg snøgt at ingen slik
heilskap finst; tankesprangi er lange og kasti brå.
Grepstad skriv av di det er på tale å gjera skriftleg sidemål valfritt i
skulen, noko han likar dårleg. Det vert sagt at skuleborni fær lite ut or
sidemålstimane, men Grepstad segjer:
"Har undervisninga i nynorsk vore mislykka i seg sjølv? Spørsmålet heng
saman med eit anna argument mot obligatorisk skriftleg
sidemålsundervisning: Munnleg undervisning er betre eller jamvel nok.
So tett heng desse spursmåli saman at Grepstad svarar på det andre istaden
for det fyrste. -No kann Grepstad verta mistydd av di han ikkje veit nett
kva jamvel tyder; han er komen til å skriva at skriftleg sidemål er so
komplett burtkasta at det vert hevda at munnleg læring er betre elder
jamvel bra. Men det han meiner, er truleg at skuleborni hev fagleg bate av
sidemålsstilen, for han vil halda på honom, og um munnleg nynorsk meiner
han at det hev vore freista, og var mislukka:
"Frå og med Jensens leseverk var i prinsippet det å lese landsmål ein
obligatorisk del av norsk skule. Då sidemålsstilen blei innført i 1907,
hadde elevane altso hatt munnleg undervisning i landsmål i 44 år. Det
finst ikkje noko som tyder på at den undervisninga til då hadde gitt nokon
positiv verknad. I så fall skulle blant anna røystetala til dømes i
Stortinget syne det. Der kan vi berre så vidt ane ei positiv endring. I
1885 blei jamstellingsvedtaket gjort med 78 mot 31 røyster. I 1907 blei
sidemålsvedtaket gjort med 62 mot 30 røyster."
Logikken haltar so det er ilt å sjå; kva kann røystetali i stortinget
segja um stoda i skulen?Stortingsmennane er vaksne og utdanna folk, fær
ein vel tru. Og um desse vedtaki kann samanliknast direkte, syner dei ingen
framgang for målstrevet, tvert um er 62 av 92 mindre enn 78 av 109. Ikkje er det 44 år
millom 1907 og 1885, heller. Og stoda fyrr 1907 kann ikkje prova at munnleg
sidemål i seg sjølv ikkje er godt nok, for i stortingsdebatten i 1907 var
det ein som var 9 år då landsmålet i prinsippet skulde hava kome inn i
skulen; han sa at alle på hans alder visste at det i deira skuledagar ikkje
var tale om noko landsmaal i det heile, og slett ikkje på skulen. Det er
sitert lenger fram i Grepstad sitt fyredrag. Nei, dette heng ikkje paa
greip!
Like fullt er Grepstad ute med skulemålsstatistikken: "I tida kring innføringa av
sidemålsstilen blir det gjennomført ein liten kulturrevolusjon i Noreg.
Frå Odelstinget vedtek landsfolkeskulelova i 1892 går det berre 18 år
før fleirtalet av elevane i Hordaland og i Sogn og Fjordane har landsmålet
som hovudmål i skulen. Etter nye ti år, i 1920, gjeld dette også eit
fleirtal av elevane i Rogaland og Møre og Romsdal, mens Telemark ligg like
under 50 %. Der blir det fylket verande i mange tiår, men i 1939 har også
Nord-Trøndelag vippa over 50 % nynorskelevar i grunnskulen."
Fleirtal i fem-seks fylke, og so skriv Grepstad um sidemålet som um det var
nynorsken det galdt? Ja, for det hev vore attergang i heile etterkrigstidi,
men det tek Grepstad ikkje med. Han kom då den nynorske skrifttraditionen
var broten av samnorskpolitikken, som heller ikkje er nemnd med eitt ord.
Heller ikkje tek Grepstad med røystetali i stortinget frå 1892, sjølv um
han litt fyrr meinte at desse tali kann syna kor mykje nynorsk skuleungane
kunne.
Grepstad legg stor vekt på å syna at argument mot nynorsken og sidemålet
er blitt "tradert" men berre det at tvo segjer det same, treng ikkje tyda at
båe tek feil. Det er litt morosamt at det vart sagt alt i 1899 at
landsmålsgrammatikken var for vanskeleg å læra seg, men etter so lang tid
med talemaalsnærleik og valfridom er det vorte sant, som ein kann sjå av
Grepstad sine freistnadar på å skriva.
Um Grepstad ikkje toler traderte argument skulle han ikkje nytta so mange av
dei sjølv, til dømes klassikaren "500 000 stillingar føreset krav om
kunnskapar i skriftleg nynorsk.." Andre hev sagt at stillingane beintfram
fyreset kunnskapar i nynorsk- so langt gjeng ikkje Grepstad, men den rundare
formuleringi kann jo skuldast fåkunne. Og når Grepstad her endå ein gong
skriv at Garborg utvikla tvo-nations-læra i 1870-åri, då er det "tradert" -
det vil segja ein feil som går att hjå mange. Men det rette tilhøvet er
og prova fleire gonger; lyt ikkje eit dokumentationssenter for nynorsk hava
den fyrste nynorske boki, Ny Hungrvekja frå 1858?
Det vert vanskeleg å diskutera sidemålsstilen med Grepstad: "Eg hevdar at
det først og fremst dreiar seg om ein motvilje skapt av kulturelle krefter
som aldri har akseptert tospråkssituasjonen i Noreg, men som skjuler si
eiga motarbeiding mot nynorsken under spørsmaalet om sidemålet."
Ein skal ikkje hevda at folk lyg, det er harde ord som gjer vidare debatt
umogoleg, so slikt skal provast. Og um nynorsk og Grepstad-målet er
einstydande ord, kann det ikkje vera diskvalifiserande i seg sjølv at ein
er skeptisk til nynorsken.
Eit serdrag ved Grepstad sin skrivestil er dei frie assosiationane. Eitt
døme fær halda; skal tru kva AKP (m-l) hev med sidemålssaki å gjera?
"I haust har på ny ein del av mediemerksemda retta seg mot den groteske
historia til AKP (m-l). Korleis kunne så mange intellektuelle vere så
intolerante? blir det spurt. Den som går inn i den nynorske skriftkulturens
historie, vil sjå at det spørsmålet kunne vore stilt mykje tidlegare.
Vulgærmotstanden mot sidemålsstilen eller mot nynorsken har aldri mangla
legitimeringsbidrag [!] frå intellektuelle krinsar. Blant verstingane finn
vi både han som seiest å vere den fremste norske tenkjaren på 1800-talet,
filosofiprofessor Marcus Jacob Monrad, og han som går for å vere ein av
dei få intellektuelle på Stortinget for tida, teologiprofessor Inge
Lønning. Den første nekta for at det var mogleg å skape kunst på
landsmålet. Den andre kallar sidemålsstilen ein narresmokk. Når aldrande
menn fnysande uttaler ordet narresmokk, skal ein lytte andektig
[andektig!!!]."
Nei, AKP (m-l) er ikkje ein fiende av Grepstad (det hev stødt vore mykje
nynorsk i Klassekampen, og Grepstad nyttar omgrepet kulturrevolution
positivt), ml-rørsla er nemd berre av di ho var intolerant, men det var
andre som var intolerante mot målrørsla lenge fyrr AKP (m-l) fanst, til
dømes Inge Lønning. Men dette med narresmokken sa han no sant å segja
fyrst i 1996, lenge etter at m-l-arane havde mista futten. Lønning er og
eit dårleg døme på ein fiende av nynorsken, han er tvertum ein av dei NRK
kann koma til når dei skal hava målkvotone fylt. Nei, narresmokken var
sidemålet, ikkje nynorsken i seg sjølv- og her hev Grepstad noko å læra.
For det er jo eit godt bilæte: målrørsla som svelt i hel medan ho syg på
sidemålsstilen sin, og når nokon vil taka honom frå henne, då skrik ho,
nett slik Grepstad gjer. Råkande. Men det er stygt, og lett å misuppfatta,
og difor kann ein ikkje skriva slik. Når ein elev som er lut leid mødesamt
sidemål gjeng til instituttet si internettsida for å få kveikt målhugen,
og vert møtt med eit stykke på den uslaste vassvelling av eit mål, der
alt han hev tenkt vert avfeid som traderte argument, der han vert kalla
intolerant og samanlikna med AKP (m-l)- han er framleis like leid
sidemålet, men no er han sur attåt. Her må institutt for nynorsk
skriftkultur tenkja taktisk- kann henda skulde Grepstad jamvel lesa Dølen
og Norsk Målsoga og læra seg det målet han skal arbeida for.